Lubina Hajduk-Veljkovićowa

Mějach ideju za tutón projekt, dokelž njeje za serbske dźěći přewulki poskitk w syći. Staram so w swobodnym času wo programěrowanje, wudospołnjenje tekstow a wobstaranje fotow, a rěčnje mam poslednje słowo. Hdys a hdys napisam tež sama tekst.
(www.lubina-hajdukowa.de)

Pětr Šołta

Zawěsće znajeće mje jako redaktora Płomjenja. Hdys a hdys pisam wěcywědne teksty, kiž hodźa so tež sobu do Prašaka zapřijeć. Wosebje zajimuju so wokomiknje za swětnišćo.
(www.plomjo.de)

Michał Eiselt

Sym wučer na gymnaziju we Wojerecach za biologiju a chemiju. W Płomjenju sym wozjewił wjacore teksty wo našim ćěle, kiž su tule zapřijate. Tež w swobodnym času sym ćělnje aktiwny - krosnuju po wšěch sćěnach, kiž so mi skića.

Ludwig Eckert

Bydlu w Smječkecach a sym w lěće 2005 moju maturu na serbskim gymnaziju w Budyšinje złožił. Nětko studuju w Lipsku wučerstwo za serbšćinu a čěšćinu.
Sym 5 lět rejował, 3 lěta pola wuměłca rysował, hraju hižo 9 lět wolejbul a lubuju hudźbu.

Wiktor Zakar

Sym Viktor Zakar z Makedonskeje. Po powołanju sym tołmačer, wokomiknje studuju sorabistiku na Lipščanskej uniwersiće. Čitam rady a wotkrywam swět přez knihi. Za "Prašak" sym so hłownje jimał přirodowědomostnych temow z coologije abo geografije.

Dušan Šołta

Rěkam Dušan Šołta a pochadźam z Budyšina. Chcu so z wučerjom za chemiju, matematiku a serbšćinu stać. Rady spěwam, čitam a po cuzych krajach pućuju. Wote mnje su teksty z wobłukow přirodowědy a nabožiny.

Matej Dźisławk

Sym w lěće 2006 na Budyskim serbskim gymnaziju maturował a so po tym za studij sorabistiki rozsudźił. Nimo studija moderěruju młodźinske wusyłanje radijo "Satkula". Tež mój fotoaparat mje stajnje přewodźuje. Hdźežkuli runje sym, prawy motiw so přeco namaka. Ale tež pisanje mi wjele wjesela čini, tohodla so tež aktiwnje za wuwiće "Prašaka" angažuju.

Magdalena Ruszczyk

Rěkam Magdalena Ruszczyk a sym z Pólskeje. Studuju slawistiku we Waršawje a sym jedne lěto sorabistiku w Lipsku studowała. Zajimuju so za literaturu a wuměłstwo. Rady pućuju, čitam a sportuju. Pisam hłownje wo Pólskej, zo bych wam swoju domiznu zbližiła.

Ireen Richter

Sym Ireen Richterec ze Šěšowa. Wot lěta 2007 studuju w Lipsku wučerstwo za zakładnu šulu. Rady spěwam a hraju na klawěrje, bubonach a akordeonje. Nimo toho rady paslu, jězdźu z kolesom, skejtuju a rejuju. W lěću sym jako kubłarka w prózdniskim lěhwje w Kwerksenlandu we Wodowych Hendrichecach.

Bogomił Ignatov

Rěkam Bogomił Ignatov a pochadźam z Bołharskeje. Bydlu we wulkim měsće Plowdiwje, hdźež studuju slawistiku. Zajimuju so za rěče, hudźbu, bodybuilding a knihi a pućuju rady po swěće. Sym jako pućowanski nawoda w Bołharskej při Čornym morju dźěłał, a tuž předstaju wam w "Prašaku" swoju domiznu.

Jednotliwe přinoški su spisali:

Marcus Koinzer, Sławomir Krowinski, Emilia Kledzik, Stefanie Geipel, Jadwiga Wróblec, Małgorzata Moźdźan, Anja Karichowa, Stefan Šołta

Awtorojo jednotliwych fotow:

Lubina Hajduk-Veljkovićowa, Claudia Löwe, Rene Weinhold, Magda Ruszczyk