Airbus 380 - najwjetše lětadło swěta

Prjedy hač dósta tute hoberske lětadło swoje čisło, mjenowaše so projekt A3XX. Pomjenowanje poćahuje so na woznamjenjenje wulkosće XXL, a dyrbješe na to pokazać, kajku njewšědnu wulkosć lětadło změje.
Airbus 380 je do třoch klasow rozrjadowany. W najlěpšej klasy maja pasažěrojo tež najwjace městna a najlěpše posłužowanje. Najniša je zdobom tež najtuńša klasa, w kotrejž njeje telko městna. Wosebitosć na nowym lětadle je, zo njejsu wšitke sydła na jednej runinje rozrjadowane, ale zo ma Airbus hišće dalši poschod. Tak ma standardny model 555 sydłow, a w najwjetšim modelu móže hač do 850 (!) pasažěrow sobu lećeć. Při tym su wotstawki mjez městnami wjetše hač w druhich lětadłach, chódby su šěrše a samo mały wobchod za nakupowanje móže so sobu zatwarić.

Skrótka to najwažniše:

Nowy Airbus njeje jenož wulki, ale zdobom tež zlutniwy a wobswětej tak nješkodźi kaž druhe lětadła. Přetrjeba ćěriwa wučinja na pasažěra a sto kilometrow něhdźe tři litry, štož je mjenje hač pola wjetšiny awtow. Tuta niska přetrjeba zniži tež lětanske kóšty a wustorčenje škódnych maćiznow. Nimo toho njeje A380 tak wótře kaž druhe hoberske lětadła, štož wězo wosebje wobydlerjow wjeseli, kiž blisko lětanišćow bydla.

Cockpit Airbusa 380.

A hdźe so Airbus 380 twari?

Dnja 7. meje 2004 bu montažowa hala za Airbus 380 w francoskim měsće Toulouse wotewrjena. Dźěle lětadła, kiž su so w druhich Airbus-zawodach zhotowili, su so do Toulouse dowjezli. Tež montažowa hala je njewšědny twar: Je 46 metrow wysoka a płonina měri 490 x 250 metrow. Zhromadnje z někotrymi druhimi twarjenjemi, kiž tež k hali słušeja, wobsteji wona z 32 000 tonow wocla. To je štyri razow tak wjele wocla, kaž je so za twar Eiffeloweje wěže w Parisu přetrjebało.
Dokelž so lětadło w hali jenož hromadźe njetwari, ale tež hnydom w Toulousu testuje, słuša k twarjenjam tež wulke "parkowanišćo" za dźesać tajkich hoberskich mašinow.
Snano njebudźe wjac dołho trać, a něchtó z was poleći prěni raz z lětadłom A380 sobu.

horje

hlej tež: