|
|
Kotra holca ju njeznaje: Šwižnu klanku z dołhimi swětłymi włosami. Zawěsće ma wjetšina z was doma Barbie-klanku. A to nic jenož klanku samu, ale k tomu hišće hromadu drasty, kłobukow, snano samo awto abo špihel k šminkowanju.
Kak zrodźi so Barbie-klanka?Na spočatku rěkaše Barbie Lilli. Lilli pochadźeše z Němskeje a wozjewi so 1952 prěni raz jako comicowa figura we wulkej němskej nowinje. Tři lěta pozdźišo wuńdźe Lilli jako plastikowa klanka. Tutón klanku widźeše Američanka Ruth Handler, kiž je hižo někotre lěta do toho zhromadnje ze swojim mužom firmu Mattel załožiła, na jězbje po Europje w jednym wobchodźe. Běše wo njej tak zahorjena, zo je sej hnydom wjacore Lilli-klanki kupiła. Zaso doma w Americe, bu z Němskeje klanki Barbie, pomjenowana po dźowce Ruth Handler, kiž rěkaše Barbara. Jeje prěnje kročelePostawa Barbie-klanki orientowaše so na klankach k zwoblěkanju, kaž je holcy tež lětstotki do toho hižo we wšelakich formach znajachu. Wosebitosć pak běše, zo njeje so jenož klanka jako tajka předawała, ale k tomu hišće tójšto drasty za nju w najwšelakorišich modach. Tak dawaše hižo za prěnju Barbie - kiž běše 29,2 cm wulka a so 1959 na wikach za hrajki w New Yorku prěni raz předstaji - 21 wšelakich drastowych kombinacijow.
Barbie-moda w běhu lětDokelž jedna so pola Barbie wo klanku k zwoblěkanju, je jeje garderoba w poslednich 50 lětach wězo jara rozrostła. Něhdźe 100 milionow metrow tekstilijow su so w tutych lětach za Barbie a jeje přećelki na drastu předźěłali. Zo by klanka přeco w najnowšich drastach po dźěćacej stwě "běhała", wopytuja sobudźěłaćerjo firmy Matell najznaćiše modowe přehladki na swěće. Tak dokumentuja drasty znateje klanki najwažniše mody zańdźenych lětdźesatkow.
Barbie wosrjedź žiwjenjaTež hdyž je njewjesćinski šat na klance jara woblubowany, a hdyž móžeš muža Kena hustohdy při jeje boku widźeć: Barbie běše přeco njewudata žona bjez dźěći. Přiwšěm pak nošeše přeco najnowše šaty, a samo z kabrio-awtom abo bydlenskim mobilom jězdźeše moderna žona po dźěćacych stwach.
|
|
hlej tež: |
