|
|
Dóstanu dypornaki poprawom hłowybolenje?To sy so zawěsće tež hižo raz prašał/a, abo? Wšako klepaja tute ptački cyły dźeń mócnje wo zdónki štomow, zo bychu picu namakali, sej hnězdźensku dźěru natwarili, swójski rewěr markěrowali abo wo partnera/-ku wabili.
Při klepanju móža dypornaki z pyskom hač do 20 razow na sekundu do zdónka dyrić. Někotre družiny klepaja wob dźeń samo hač do 12 000 razow do drjewa. Při tym skutkuja na ptačka hoberske mocy: Pysk dyri z 25 km/h wo zdónk, tak zo dyrbi ćěło dypornaka při kóždym (!) klepnjenju borzdźenske mocy wudźeržeć, kiž su něhdźe sto razow wjetše hač mocy, kiž skutkuja na astronawta při přizemjenju ze swětnišća. Tohodla so čłowjek praša, hač nima dypornak po napinacym dnju hłowybolenje. Móžu was změrować: Ně, ptačkej klepanje ničo njewučini, a wón njedyrbi tež wšědnje někajku tabletu brać, zo by bolosće znjesł. To ma wšelake přičiny. Sprěnja maja dypornaki jenož mało mozoweje wody, tak zo sedźa mozy poměrnje kruće w nopje. Tohodla njeprasnu mozy při kóždym sylnym dyrje wo twjerdu kosć nopa a ptačk njedóstanje střasenje mozow (Gehirnerschütterung). K přirunanju: Pola čłowjeka płuwaja mozy takrjec w mozowej wodźe. Hdyž dóstanje na přikład pjasćowar sylny dyr wo hłowu, prasnu mozy wo kósć nopa. To wězo njeje strowe a wjedźe spěšnje k střasenju mozow. Zdruha su mozy dypornaka wot sylnych musklow wobdate, kiž funguja kaž storkidušaki (Stoßdämpfer). Hdyž prasnje ptačk z pyskom wo drjewo, wón tute muskle napina, tak zo so wjetšina borzdźenskeje energije wotwjedźe. Střeća dźerži dypornak při klepanju hłowu a šiju stajnje runje, tak zo žane přidatne mocy (na přikład přez wjerćenje šije) na małe ćěło njeskutkuja. A dokelž nimaja dypornaki žane nawoči, začini ‚ćěsla lěsa' - kaž so ptačk tež mjenuje - jednu milisekundu před dyrom wo drjewo wóčce, zo by jej před drjewjanymi třěskami škitał.
|
|
hlej tež: |
