Fundamentalizm - wuraz z nabožiny

Tute słowo dopomina na wuraz "fundament" při twarje domskeho, a woprawdźe wotwodźuje so wone tež wot tutoho łaćonskeho zapřijeća, štož woznamjenja "zakład". Fundamentalizm je potajkim wuwědomjenje fundamenta, potajkim zakładow nabožiny. Fundamentalistow maš w kóždej nabožinje. Woni su kruće wěriwi a měnja husto, zo je jich nabožina ta jenička prawa a zo měli přećiwo kóždemu, kiž je hinašeje wěry, wojować.

Islam a fundamentalizm

Zapřijeće fundamentalizm słyšimy husto w zwisku z islamom. Islam je wulka nabožina kaž křesćanstwo abo Židowstwo tež a poprawom měrliwa, wšako steji w koranje, zo ma islam bjez namocy być. Koran je swjata kniha islama, kaž je to w křesćanstwje biblija.
Někotři fundamentalistiscy wěriwi pak měnja, zo je islam ta jenička prawa nabožina, po kotrejž maja wšitcy ludźo na swěće žiwi być a so jeje prawidłow dźeržeć. Tajkich ludźi mjenujemy islamistiskich fundamentalistow abo islamistow. Někotři z nich chcedźa swoju nabožinu z namocu přesadźić. Woni hidźa wšitke kraje, w kotrychž su ludźo po druhich nabožinach žiwi, a nadpaduja abo wohrožuja je z terorowymi nadpadami.

Fundamentalistiscy terorisća

Tajcy terorisća chowaja so po cyłym swěće, zo njeby jich policija tak lochce namakała. Mjezsobu sćelu sej tajne zdźělenki na přikład přez internet. Dokelž su tući terorisća kaž z nitkami syće mjezsobu zwjazani, rěčimy wo islamistiskej terorowej syći.
Najznaćiša skupina w tutej syći je terorowa skupina El Kaida. "El Kaida" je arabsce a woznamjenja "baza". Přiwisnicy El Kaidy su po cyłym swěće žiwi. Jich wjednik je Osama Bin Laden, najbóle pytany terorist cyłeho swěta.

horje

hlej tež: