Girafa je cycak, kiž je na afriskim kontinenće žiwy. Pomjenowanje "girafa" wotwodźuje so wot arabskeho słowa "zarâfa".

W běhu někotrych milion lět je girafa swoju dołhu šiju wuwiła, tak zo móže łopjena na wjeršku štomow dosahnyć. Girafa je najwyše zwěrjo na swěće dźakowano swojej šiji, kotraž móže do 5,50 m dołha być. Přiwšěm ma jeje šija 7 rjapowkow (Wirbel) kaž pola druhich cycakow.

Girafa žerje łopjena a wubitki štomow a kerkow, płody, trawy a zela. Nimo toho je girafa žuwak.

Muska girafa je 1500 kg a žónka 1100 kg ćežka. Jeje brjuch je běły, a ćěło je žołte z brunymi blakami. Kóžda girafa ma swójski muster, kiž je dobry tarnowanski škit. Na hłowje ma rohaj.

Girafy su něme, widźa pak wuběrnje. Tak spóznaja strachi sčasom a móža spěšnje ćeknyć. Girafy běhaja w runostupje, to rěka najprjedy z nohomaj na jednym a potom z tymaj na druhim boku. Runowahu dźerža při tym ze šiju.

Z wuwićom girafow su so tež rostliny jich wysokosći přiměrili, kaž na přikład afriska akacija.

Najwjetši njepřećel girafow nimo čłowjeka je law.

Do rozmnoženja wojuja muske girafy wo žónku, při čimž pak so njezranja. Žónka dóstanje stajnje jedne młodźo. Wona porodźi stejo, tuž padnje młodźo z wysokosće dweju metrow na zemju. Młodźo dyrbi jara spěšnje na nohomaj stać, hewak je mać wopušći. W starobje 6 měsacow ma młodźo wysokosć dorosćeneje girafy.

horje

hlej tež: