Chłóšćiš rady? Sy so hižo prašał/a, čehodla rěka Haribo runje Haribo abo zwotkel "złote bariki" přińdu?

Złote bariki su najznaćiši produkt firmy Haribo.

Mjeno Haribo

Hans Riegel załoži w lěće 1920 w Bonnje firmu Haribo. Mjeno zestaja so z prěnjeju pismikow mjenow "Hans Riegel" a "Bonn".

K wosobinje Hansa Riegela

Hans Riegel narodźi so 3. apryla 1893 we Friesdorfje pola Bonna. Po šuli zakónči wukubłanje jako plackowy kuchar a dźěłaše 5 lět we firmje Kleutgen & Meier. Po Prěnjej swětowej wójnje pytaše firma Heinen plackoweho kucharja. Hans Riegel dósta tute dźěło a sta so skónčnje samo ze sobuwobsedźerjom. Firma rěkaše wotnětka Heinen & Riegel.
13.12.1920 załoži Hans Riegel swójsku firmu w Bonnje. Spočatnje měješe jenož marmjelowu desku, stólčk, murjowane kuchinske kachle, koporowy kotoł a walcu w swojej dźěłarni. A potom započa so wuspěšna a słódka stawizna.

Firma Haribo

Hans Riegel wumysli sej w lěće 1922 "rejowaceho barika". Z toho wuwi so pozdźišo mjeno "złoty barik".
Hakle w lěće 1923 - 3 lěta po załoženju firmy - kupi sej Riegel swoje prěnje awto. Gertrud Riegel, jeho mandźelska, bě do toho produkty z kolesom rozwožowała.
Wot lěta 1935 wužiwa so wabjenska sada "HARIBO macht Kinder froh". Hakle 30 lět pozdźišo přida so "und Erwachsene ebenso".
1945 zemrě Hans Riegel a jeho žona Gertrud přewza předewzaće.
Wot lěta 1962 wabi firma w telewiziji za "złote bariki".
W nimale kóždym kraju Europskeje unije a tež w Americe ma Haribo wotnožku. Tohodla znaja wšitke dźěći a wšitcy dorosćeni na cyłym swěće "złote bariki".

Najwuznamny produkt: lekwica

Jendźelski apotekar George Dunhill wunamaka lekwicu. W lěće 1790 doda rozpušćenemu słódnikowemu ekstraktej (Süßholzextrakt) cokor a dalše přidawki. W lěće 1925 započa so lekwicowa produkcija. Lekwicowy šlink je najwuznamniši produkt. Sobudźěłaćerjo zwichu šlinki z rukomaj, doniž njewunamaka Peter Riegel mašina tež za to.

Lekwica wobsteji ze słódnika (słódkeho drjewa), ludźo su sej ju hižo w antice słodźeć dali.

Kotry barik słodźi hinak?

Bariki wobsteja ze sćěhowacych přidawkow: glukozowy sirup, cokor, dekstrosa, želantina (swinjaca) , barbjace płodowe a rostlinowe koncentraty (za barbu), aromy, škrob, citronowa kisalina a słódnikowe ekstrakty. W kotrym poměrje su změšane, wostajnje potajnstwo.
Kóžda barba barika pak ma swój słód. Wot lěta 2007 je jich šěsć. Jeli njejsy hišće wučuł/a, kotra barba za čim słodźi, maš tu přehlad:

horje

hlej tež: