Předzłóžka "homo" pochadźa z grjekšćiny a rěka přełožene "samsny".
Homoseksualita woznamjenja potajkim, zo zalubuješ so jenož do někoho, kiž ma samsny splah, a so přeješ sej z nim splažny/ seksualny kontakt. Potajkim hdyž lubuje muž muža a žona žonu. Tomu praji so tež "šwulny" abo "lesbiska".

Dołhi čas bě homoseksualita něšto tajne abo samo zakazane.

Stawizny homoseksuality

Hižo přeco běchu někotři ludźo homoseksualni, jenož rěčeć so wo tym njeje směło. W Němskej bě dołhi čas samo zakazane, zo mataj mužej lubosćinski poćah. Žonam njebě to drje zakazane, ale to zaležeše skerje na tym, zo njepřińdźe nichtó na mysličku, zo móhła žona žonu lubować. Za čas nacionalsocializma (1933-1945) buchu homoseksualni samo zajeći a do koncentraciskich lěhwow tyknjeni. Tež dźensa hišće su homoseksualni w mnohich krajach přesćěhowani a potłóčowani.

Homoseksualita dźensa

Tež pola nas jewi so husto měnjenje, zo je homoseksualita něšto strašne abo wohidne. Wjele dźěći a młodostnych wužiwa słowo "šwulny" jako wudmo, bjez toho zo scyła wo tym přemysluja.
Katolska cyrkej je měnjenja, zo je homoseksualita hrěch. Tola wjetšina ludźi pola nas mysli mjeztym, zo móže kóždy lubować, kohož chce.
Z awgusta 2001 móža so homoseksualne pory w Němskej tež woženić. Nic w cyrkwi, wšako wotpokaza wona homoseksualitu, ale na stawnistwje. Rěči so potom wo mandźelstwje homoseksualneju.

Christopher Street Day je swjedźeń homoseksualnych. Woni demonstruja z nim přećiwo diskriminaciji a wumjezowanje homoseksualnych.

Coming-out

Hdyž praji něchtó swojej swójbje, swojim přećelam abo druhim ludźom wotewrjenje, zo je homoseksualny/-a, mjenuje so to "coming out" (won přińć). Mjeztym čini to přeco wjace ludźi, mjez nimi je tež wjele znatych kaž hudźbnik Elton John abo hrajerka Ulrike Folkerts, měšćanosta Berlina Klaus Wowereit abo šef FDP Guido Westerwelle.

Tučelojta chorhoj jako symbol

Tučelojta chorhoj je symbol homoseksualnych po cyłym swěće. Wona woznamjenja, zo je znajmjeńša telko móžnosćow zhromadneho žiwjenja kaž barbow w tučeli.

horje

hlej tež: