Kopřiwa je rostlina z napřećo-stejnymi zubičkatymi ćmowo-zelenymi łopjenami. Ma małe a zelenkojte kćenja. Eksistuje 30 wšelakich družin kopřiwow. Kopřiwa rosće tam, hdźež je wjele dusyka.

Snadź sy hižo raz kopřiwu přimnył/a a so zwožahał/a. Cyła rostlina je połna wožahawych włóskow, kiž škitaja kopřiwu. Tute włoske wotedawaja mrowjacu kisalinu, kotraž wožaha kožu.

Kopřiwu spóznaješ derje na jeje zubičkatych łopjenach.

Najrozšěrjenišej kopřiwje stej wulka kopřiwa (Urtica dioica), 50 cm hač do 1 metra wysoka, a žahata kopřiwa (Urtica urens), kotraž je mjeńša hač 50 cm.
Kopřiwa je bydło za mnohe wužitne překasancy kaž šćóny, a mjetelčki wotkładuja na delnjej stronje jeje łopjenow jejka. Jeli chceš potajkim w swojej zahrodźe mjetelčki měć, je derje, hdyž wostajiš něšto kopřiwow stejo.

Kopřiwy wužiwaja so za hojenje a zhotowjenje lěkow. Njerědko přihotuje so z nich tež poliwka, omlet abo čaj.

horje

hlej tež: