Pod "k" kaž komponisty steji jako znaty serbski komponist Bjarnat Krawc. Ale čehodla je wón znaty a što je na nim wuznamne?

Žiwjenske daty

Bjarnat Krawc narodźi so 5.2.1861 w Jitru (ně.: Milstrich) pola Kamjenca. Nimale čas žiwjenja skutkowaše wón w Drježdźanach jako komponist, dirigent a hudźbny wučer.
1945 ćekny wón z Drježdźan, dokelž buchu bombardowane, a zasydli so lěto pozdźišo we Warnoćicach. 25.11.1948 zemrě we Warnoćicach (w Čěskej, ně.: Varnsdorf).

Kubłanje a powołanje

Z 13 lětami - wot lěta 1874 - chodźeše na Krajnostawski wučerski seminar w Budyšinje. Tam dirigowaše pozdźišo chór towarstwa serbskich seminaristow "Swoboda". Po zakónčenju studija běše wot lěta 1882 z wučerjom w Rakecach. Tamniša zakładna šula rěka dźensa "Bjarnat Krawc".

Čas žiwjenja skutkowaše Bjarnat Krawc w Drježdźanach.

Žiwjenski čas w Drježdźanach

Bórze nastupi Krawc wučerske městno na Mochmannowym instituće w Drježdźanach, zo by nimo wučerjenja tež čas za komponowanje a studij měł. Wot lěta 1887 studowaše tam na Kralowsko-sakskim konserwatoriju komponowanje. Krawc wožiwi nowe serbske hudźbne žiwjenje we Łužicy a hraješe wuznamnu rólu w Drježdźanskim hudźbnym žiwjenju: Wón załoži w lěće 1893 němski žónski chór a dirigowaše w lěće 1896 šulski koncert składnostnje serbskeje narodopisneje wustajeńcy.

Wuznamne twórby

Hromadźe z basnikom Jakubom Bartom-Ćišinskim a w přećelstwje z čěskej spěwarku Saakowej nastawachu prěnje wuznamne wokalne a instrumentalne twórby noweje serbskeje wuměłskeje hudźby.
Za čas Druheje swětoweje wójny stwori zhromadnje z basnikom Michałom Nawku swětny oratorij "Wójna a měr" (jedna z jeju poslednich twórbow).

Wuznam za Serbow

Bjarnat Krawc bě hłowna postawa serbskeho hudźbneho žiwjenja wosebje w mjezywójnskim času. Na chórowym polu, kiž bě tehdy srjedźišćo serbskeho hudźbneho žiwjenja, skoponowa wón wjele chórowych sadźbow, nimo toho tež wjetše a mjeńše instrumentalne twórby. Wón spyta prěni serbski orchester załožić a zasadźowaše so za wozrodźenje serbskich ludowych rejow w ludźe a na jewišću. Jeho tworiwosć bě wusko zwjazana z praktiskimi potrjebami a ze jeho cyłkownym patriotiskim prócowanjom.
1923 běše Krawc sobuzałožer Zwjazka serbskich spěwnych towarstwow. Z wjetšimi serbskimi chórami předstaješe Krawc serbske spěwne wuměłstwo tež zwonka Łužicy. Mjez 1920 a 1930 wuhotowa w Budyšinje wulke koncerty.
1947 spožči jemu narodna organizacija Domowina titul "Narodny wuměłc serbskeho luda".

Znaješ jeho knihi?

Wulke zasłužby ma Krawc za šulske - wosebje za serbske - spěwanje. Hižo 1910 wuda šulski spěwnik "Chwatajće, ale spěwajće" a 1930/31 hromadźe z Michałom Nawku reprezentatiwny dwuzwjazkowy šulski spěwnik "Naše spěwy".

horje

hlej tež: