|
|
Kak wuwiwa so poprawom nowe lětadło?Wot prěnjeje ideje hač k hotowemu nowemu lětadłu zańdźe hustodosć dźesać abo samo hišće wjace lět. Tohodla dyrbja zamołwići inženjerojo wot wšeho spočatka wědźeć, kak móhło nowe lětadło wupadać, kak wulke ma być, kak drohe budźe, kelko městnow za pasažěrow změje a tak dale.
Za kompjuterami dźěłaja inženjerojo a technikarjo zhromadnje na wuwiću lětadła. Jednotliwe wotrjady maja wšelake pomjenowanja a nadawki: Aerodynamikarjo naćisnu na přikład křidle, tyłow a wodźidła. Statikarjo wobliča trěbnu stabilitu jednotliwych dźělow lětadła, zo by wone tež při wulkim wichorje a w ekstremnych situacijach derje lećało a přizemiło. Elektronikarjo wuwija cockpit z připrawami za nawigaciju a škričkowanje, potajkim z tójšto wobrazowkami a elektroniskimi nastrojemi. Naposledk slědźa producenća ćěriwow samo hišće za kmanym ćěriwom za wotpowědny lětadłowy typ. Inženjerojo dźěłaja wusko hromadźe, tak zo móže so kóžda změna hnydom wšitkim dale dać. Tak so mjez druhim tež lěty na kompjuteru simulěruja, zo bychu so model a rozdźělne materialije pod najwšelakorišimi wuměnjenjemi wupruwowali. Hdyž je kompjuterowy model hotowy a hdyž předleži dosć skazankow za nowe lětadło, so prěnje lětadło, tak mjenowany prototyp, twari. Producenća maja hoberske hale za kónčnu montažu wulkich lětadłow. W nich nastawa z jednotliwych dźělow kaž z tyłowa, ćěridłow, křidłow a kolesow nowe lětadło. Dźěle za hotowe lětadło dodawaja wšelake mjezynarodne zawody. Lětadła pak njetwarja so kaž awta po stach na montažowym pasu, dokelž je ličba skazankow za to přeniska. Kóžda lětanska linija ma wosebite přeća, štož nastupa wonkowne a nutřkowne wuhotowanje lětadłow. Tohodla dyrbi so kóžda mašina jednotliwje hromadźe twarić. Pola wobchadnych lětadłow je hižo wulki wuspěch, hdyž je so 500 lětadłow natwariło a předało. Ale prjedy hač móže so prěni zjawny start přewjesć, je hišće wjele testowych lětow trěbnych.
|
|
hlej tež: |
