Hižo za čas žiwjenja legenda

Czesław Juliusz Wydrzycki - pseudonym Niemen - narodźi so 16. februara lěta 1939 w Starych Wasiliszkach (dźensa Běłoruska) a zemrě 17. januara 2004 we Waršawje. Husto mjenuje so Niemen najwuznamniši pólski hudźbnik 20. lětstotka, ale hižo za čas žiwjenja bě wón legenda.

Pólski hudźbnik Niemen - hižo za čas žiwjenja legenda.

Idol młodźiny

Hižo zahe pokaza so jeho hudźbny talent. Debitowaše spočatk 60tych lět jako wokalist bigbitoweje hudźbneje skupiny "Módro-čorni" (Niebiesko-czarni). W lěće 1967 bě po spěwnym festiwalu w Opolu po cyłej Pólskej znaty a sta so dźakowano spěwej "Dziwny jest ten ?wiat" z idolom młodźiny a tež z přikładom "kwětkowych dźěći". Tón spěw je najwuznamniši pólski protestsong a je hišće dźensa jara popularny.

Indiwidualna hudźba

Niemen njeda so wobliwować ani wot zapadnych hudźbnych stilow ani wot tehdyšeho socialistiskeho systema w Pólskej. Niemen bě přeco jara znaty a wažny za zjawne měnjenje.
Jeho hudźba běše jara indiwidualna, sahaše wot psychodeliskeho rocka, progresiwneho rocka (Niemen Enigmatic) hač k awangardowemu jazz-rockej (Niemen Vol 1) a elektroniskeje hudźbje.

Niemen jako komponist

Komponowaše spěwy na teksty pólskich romantikarjow kaž C. Norwida, A. Mickiewicza a dalšich pólskich basnikow - Z. Herberta abo B. Lesmiana.
Pisaše tež sam wjele tekstow, kotrež maja wizionarny charakter. Niemen je spisar hudźby za dźiwadło, telewiziju a film (na přikład A.Wajdy).
Smjerć Niemena bě za wšitkich w Pólskej wulki šok a wjace hač 3 tysac ludźi so z nim na dnju pohrjeba rozžohnowa.
Hišće dźensa so praji, zo je jeho hudźba w Pólskej bjez konkurency.

horje

hlej tež: