Njetopyr je lětacy cycak, kiž je na ćěmnych a włóžnych městnach, na př. w prózdnjeńcach, žiwy.

Njetopyr spi wisajo.

Je na 950 družinow rozdźěleny. Wjetšina z nich su w nocy aktiwne a wot insektow žiwe. Z pomocu swojeju wulkeju wušow, wosebiteho słucha a ultrazwuka popadnu swoju žratwu. Wotedawaja we wěstych wotstawkach ultrazwuki, kiž so na předmjetach wokoło nich wotražuja. Přińdźe-li jim insekt napřećo, móža spěšnje jeho zdalenosć "wusłyšeć" a jón popadnyć.

Lětać móže njetopyr, dokelž ma mjez ćěłom a porstami kóžki. Jenož cyle zrědka chodźi wón po zemi.

Njetopyr rozmožuje so w starobje 2 do 3 lět. Ma zwjetša jenož jeničke młodźo, zrědka dwójnikow. Wobstatk njetopyrjow pomjeńšuje so čłowjeskeho wašnja žiwjenja dla: Mjeztym su mnohe stare štomy ze škałobami porubane, a łubje a pincy su tak derje zamurjowane, zo njemóža sej njetopyrje w nich hižo schow pytać.

Wo njetopyrjach šěrja so dźensa hišće wopačne powěsće. Tak njejsu njetopyrje slepe (widźa jenož špatnje), njetwarja sej hnězda a njerozmnožuja so kaž myše. Tež wot kreje čłowjekow so wone nježiwja, jeničce družina wampirowych njetopyrjow w Sewjernej a Južnej Americe kusnje spjace kruwy a konje, liza jich krej a je z toho žiwa. Najwjetši njepřećeljo njetopyrjow su sokoły a parazity.

W zymje njetopyrje spja, při čimž bywaja cyle zymne a krute - zda so nimale, jako njebychu hižo žiwe byli. Na tute wašnje přetrjebaja mjenje energije.

W Awstralskej maja je za nócne fantomy, a w Chinskej přinjesu njetopyrje zbožo.

horje

hlej tež: