Cyle wosebity cycak je pyskač (Schnabeltier) - zwěrjo z kačkojtym pyskom, wopušu kaž bobr, płuwanskimi kóžkami na nohach a hustym kožuchom. Něhdy běchu ludźo měnjenja, zo je pyskač łažak, dokelž nosy wón jejka. Ale ně, pyskač słuša k rjadowni kloakowcow z klasy cycakow.

Rjadowanje cycakow

Po wašnju rozmnoženja rozrjaduja so cycaki na tři skupiny: na kloakowcy (k nim liča jenož mrowjak a pyskač), měchawcy (kaž kenguruh) a placentalne zwěrjata (wšitke dalše cycaki). A kloakowcy njesu jako jeničke cycaki jejka z poměrnje ćeńkej skorpiznu.

Mrowjak (Ameisenigel) w Awstralskej. Wón słuša kaž pyskač ke kloakowcam.

Hdźe je pyskač žiwy

Pyskača namakamy we wuchodnej a južnej Awstralskej a w Tasmaniskej. Před wjacorymi milionami lět běchu kloakowcy tež w druhich krajach žiwe, štož dopokazaja fosilne zawostanki kloakowcow na př. w Argentinskej.
Pyskač twari sej 5 do 30 m dołhe prózdnjeńcy podłu brjoha rěkow a rěčkow. Ze swojim pyskow přeborka wón spódk wodźiznow, pytajo za insektami, wačkami a račkami.

Młodźata

Hdyž so 2-4 młodźata z jejkow wulahnu, cycaja wone młoko pola maćerje. Dokelž pak nimaja wuwitu tlamu, wotlizaja wone mloko z ćěła maćerje.

horje

hlej tež: