Kaž je skutkowanje Jězusa zakład křesćanskeje wěry, tak stej žiwjenje a wučba Siddharthy Gautamy, historiskeho Buddha, žro buddhistiskeje nabožiny.

563 do Chr. narodźi so sewjeroindiskej kralowskej swójbje syn, Siddhartha Gautama, "tón, kotryž je (swój) cil docpěł".
Widźer běše nanej wěšćił, zo budźe jeho syn pak wulki kral pak wulki swjaty. Zo by so syn z wulkim kralom stał, njeda nan jeho nabožinsce kubłać a njepřizwoleše, zo widźi syn horjo.
Hižo jako dźěćo běše Siddhartha nimoměry mudry a wobdarjeny.
Ze 16 lětami woženi so z princesnu Yasodharu. Bydleštaj w krasnym palasće, hdźež materielnje ničo njeparowaštaj.

Siddharthu pak to njespokoješe a njewupjelnješe. Tuž poda so z 29 lětami, krótko po porodźe jeničkeho syna Rahule, na krótke pućowanja. Na nich zetka zbrašeneho, starca, choreho a asketa a wuhlada tłajace mortwe ćěło. Siddhartha spózna, zo su chorosć, staroba, horjo a smjerć kruće ze žiwjenjom splećene. Ani bohatstwo a derjeměće tutym njewotpomhatej.

Tak rozsudźi so namakać wupuć z horja a ćerpjenja.
Wón wopušći doskónčnje swójbu a bjezstarostne žiwjenje w palasće.
6 lět běše žiwy w krutej askezy, tak zo wumrě nimale z hłodom. Wotmołwy a nutřkowny měr pak njenamaka. Tuž wotwobroći so wot tradicionelnych nabožinow a metodow swojeho časa, zo by swójski puć nastupił.

Mjeno Buddha woznamjenja "tón, kiž je wotućił".

Jako 35-lětny sedźeše raz hłuboko zanurjeny pod figowcom. Tu so rozswětli. Wuswobodźi so wot hidy, požadliwosće a njewědy. Wot tutoho wokomika sem běše Buddha, "tón, kotryž je wotućił". 45 lět dołho rozwučowaše nětko lud wo dobrych počinkach, meditaciji a mudrosći. Wučeše jich "srjedźny puć": žiwjenje mjez luksusom a askezu. Puć, kotryž wjedźe k "wotućenju", křesćan by prajił do raja.

horje

hlej tež: