Žurki su hrymzaki a přiwuzne z wulkimi a pólnymi myšemi. Předewšěm su žiwe w euraziskich stepach a sawanach, ale tež pola nas. Eksistuje něhdźe 200 družinow žurkow. Domjacy žurk, kiž maja snadź někotři z was doma, pochadźa ze Syriskeje, potajkim juhowuchodnje Turkowskeje. Možemy je dźělić na małke, srjedźne a wulke žurki.

Domjace žurki pochadźeja ze Syriskeje.

Žurki maja wosebite ćěło

Žurki maja 16 zubow. Krajaki rostu čas žiwjenja. Žurki je při hrymzanju wottrjebuja a dyrbja tuž stajnje něšto kusać. Maja drje krótke wopuški, móža pak cyłkownje hač do 34 cm dołhe być.
Nimo toho ma žurk licowej tobole. Hdyž žerje, možetej samo dwójce tak wulkej być kaž jeho hłowa. W nimaj chowa žurk cyrobu a nosy ju do swojeje podzemskeje dźěry. Žurki žeru předewšěm zorno: pšeńcu, rožku, ječmjeń, wows, symješka słónčneje róže a kukuricu, ale tež cornflakesy, a pija wodu.

Hdźe bydli žurk?

Žurk twari sej spody zemje jamu, kiž ma njeličomne chódby. Sahaj hač do dweju metrow do zemje. W nich su wjacore bydlenske stwy a składźišća, hdźež składuje žurk w nazymje někak dwaj do pjeć kilogramow cyroby. Trjeba ju za čas po swojim zymskim sparje. Potom njerosće wonka na polach hišće ničo. Žurk pak ma so po swojej zymskej přestawce, hdźež je wjele tuka přetrjebał, porjadnje nažrać. Spočatk apryla wulěze wón potom zaso ze swojeho schowa a pyta w nocy za cyrobu.

Małe žurki narodźa so po 21 dnjach bjez kožucha.

Kak dołho su žurki žiwe?

Žurki su někak 2 do 3 lěće žiwe. Wodnjo spja a w nocy su aktiwne. Tuž sej přemysli, prjedy hač stajiš sej klětku ze žurkom do jstwy, zo wón po nocach běhach a hrymza. Hdyž ma žurk młode, wopušća wone hižo po 2 abo 3 tydźenjach hnězda.

Wot apryla pyta žurk zaso wonka za cyrobu. Na wobrazu: Sibirski žurk.

Sibirski žurk

Sibirske žurki su jara małke, tohodla rěkaja tež mini-žurki. Při tym rostu cyłe žiwjenje. Maja šěry kožuch a běły brjuch. Na chribjeće maja ćmowu smuhu. W zymje je jich kožuch swětłošery abo samo běły. Sibirske žurki su žiwe w stepach zapadneje Sibirskeje a móža samo trójce do 7 króć wob lěto młodźata měć.

horje

hlej tež: